iruñea. Joan Perez de Lazarraga idazle euskaldunaren eskuizkribua abiapuntutzat hartuta, iruindarrak XVI. mendera eginen dute bidai, Nafarroako Ateneoak eta Iruñeko Udalak Errenazimendu garaiko euskarazko literaturaren inguruan antolatu dituzten ekitaldiekin. Hi-tzaldi hauetan, garaiko euskarazko literatura aztertuko dute adituek, idazle arabarraren testuak irakurtzearekin batera. Jarduera hauek hilaren 12tik 14era bitarte eginen dira, Descalzos kaleko Kultura Alorreko Erraldoien Txokoan.

Iruñeko Udaleko Euskara koordinatzailea den Iñaki Azkonak adierazten duenez, idazle hau aztertzea erabakitzeko izan dituzten arrazoien artean, garai horretako literaturaren ezaugarri "in-teresgarriak" euskaraz biltzen dituela da.

Madril, 2004 Duela bost urte euskal literaturak berri on bat jaso zuen: euskaraz idatzitako Errenazimendu garaiko testu bat aurkitu zuten Madrilgo liburutegi batean. Albisteak oiartzun handia izan zuen euskal gizartean, batez ere literaturaren munduan.

Lanaren edukiek 1564 eta 1567 urteetan euskaraz idatzitako bertso, kanta eta maitasun-kontuak biltzen dituzte, garai horretan boladan zegoen estiloa baitzen. Gainera, hau guztiarekin batera, XVI. mendean gustukoak zituzten mitologia kontakizun bat gordetzen du Lazarragaren eskuizkribuak.

Bestalde, testuak Arabako euskalkian idatzitako hitzek osatzen dituzte, eta hauek euskal hizkuntzari nolabaiteko aberastasuna ematen diete, izan ere, herrialde honetan aspaldian galdu baitzen euskara.

jardunaldiak Datorren asteko ekitaldiei hasiera emanen diena Iñaki Aldekoa, Literatur kritikoa eta Euskal Herriko Unibertsitateko (EHU) irakaslea, izanen da. Honek, Lazarragaren literaturan islatzen den Errenazimenduaren garaia aztertuko du. Ondoren, egun berean, Aingeru Epaltza idazle iruindarra gari horretako beste euskal idazleen inguruan arituko da, Jende susmagarria, Axular eta bertze hitzaldian.

Jardunaldien bigarren egunean, Aitzpea Leizaola antropologoak, garai horretan Euskal Herrian eta Europa osoan boladan ziren sorginkeria-auzien balio etnografikoen berri emanen du, De Lancre liburua irakurriz. Leizaolak amaitu ostean, Euskaltzaindiaren Azkue Liburutegiko liburuzaina den Pruden Gartziak, Joan Perez de Lazarragaren inguruan jakin beharreko zazpi gauzen berri emanen du.

Ostegunean, eta ekitaldiei amaiera emateko, Euskal Herriko Unibertsitateko Gidor Bilbao irakasleak, Arabako idazlearen eskuizkribuko artzain nobela eta poema liburuak aztertuko ditu, eta, ondoren, testuak irakurriko ditu.