Txeroki. Izengoitiak ematen ere ikasiko dugu noizbait herri honetan. Bataiatzaileek indiotasuna nabarmendu nahi bazuten -basatasuna, basakeria eta hori guztia- hobe zuten bertze gerla-izen bat hautatu. Garai bateko westernak behar bezala aztertu balituzte, jakinen zuten txerokiak Estatu Batuetako hegoaldeko "tribu zibilizatuetariko" bat zirela, alfabeto bat izan zuten bakarrenetarik.

Garikoitz Azpiazu, Txeroki , atzo goizean atxilotu zuen poliziak. ETAko burua omen zen, baldin eta ETAk egiazki bururik badu. Cauteretsen zebilen, Pirinioen erdi-erdian, Lurdesetik ez sobera urrun. Ez da munduko tokirik txarrena Bigorrako bazter hau. Nafarroako erregina Joana Albretekoak toki kutuna zuen Cauterets. Hona etortzen zen, bertako ur sendagarrien laguntzaz ajeak eztitzera. Gaur egun, mendiaren eta eskiaren bitartez estresa zaindu nahi duenak ere badu inguruan non aritu, hainbertze euskaldunek ederki dakiten bezala. Heldu den asteburuan, gure herriko makina bat jende goiti eta beheiti ibiliko da, lerra eta lerra, Txeroki harrapatu duten lekutik kilometro guti batzuetara. Igande gauaz, beren etxeen epelera itzuliko dira denak, goxo-goxo.

Loiolako trena huts egin zuten, abiadura handiagokoa etorriko zelakoan. Geltokian baraturik daude, eta ez dira oraino ohartu trabesarik ere ez dagoela. Indio izatea hautatu dute, oroitu gabe western guztietan nor ateratzen den galtzaile. Banan-banan eror-tzen ari dira, beren aurreko guztiak erori ziren gisa berean. Biografia-hausleen biografia hautsiak. Jadanik aurreikus dezakegu: kolpetik gabe, tantaka etorriko da amaiera. Ez, jakina, haiek amesten zutena. Ikusleren batzuk geldituko dira orduan, salatik alde egin gabe, bertzelako zerbaiten esperantzan. Norbaitek prestatu beharko lituzke apur horiek, pantaila handian the end agertzen denerako.